Gyda Diwrnod Shwmae Su’mae ar 15 Hydref, mae Ysgrifennydd y Cabinet dros Gyllid a’r Iaith Gymraeg, Mark Drakeford, wedi annog grwpiau cymunedol i wneud cais am gyllid i helpu’r iaith Gymraeg i ffynnu o Gynllun Grantiau Bach Perthyn.
Wedi’i weinyddu gan Cwmpas, mewn cydweithrediad â PLANED, gall grwpiau cymunedol wneud cais am grant bach o hyd at £10,000 yr un, i’w helpu i sefydlu menter gymdeithasol newydd, a/neu brosiectau tai dan arweiniad y gymuned.
Nod y grant yw creu cyfleoedd economaidd, darparu tai fforddiadwy, a chefnogi cymunedau sy’n siarad Cymraeg, gyda niferoedd uchel o ail gartrefi.
Dyma bedwerydd rownd y grant, a hyd yn hyn, mae 47 o brosiectau cymunedol wedi sicrhau cyllid.
Dywedodd Rheolwr Asedau Cymunedol Planed, Cris Tomos: “Mae cyllid grant Perthyn yn parhau i fod yn elfen gymorth ariannol bwysig yn y cam cyntaf, ar gyfer prosiectau cymunedol newydd ac sy’n ehangu, datblygu mentrau o amgylch cefnogi’r Iaith Gymraeg, a Chynlluniau Tai Cymunedol. Mae llawer o’r busnesau newydd rydyn ni wedi’u cefnogi yma yng Ngorllewin Cymru wedi mynd ymlaen i sefydlu cwmnïau cydweithredol cofrestredig, sydd bellach yn prynu tir ac eiddo, er mwyn hybu’r economi leol.”
Mae’r cynllun grant yn cael ei weinyddu gan Cwmpas, ar ran Llywodraeth Cymru.
Dywedodd Jocelle Lovell, Cyfarwyddwr Cymunedau Cynhwysol yng Nghwmpas: “Rydym wrth ein bodd yn gweithio gyda phartneriaid fel PLANED, i gyflawni prosiect Perthyn. Mae Perthyn yn gweithio gyda’r cymunedau, i nodi ffyrdd o fynd i’r afael â’r diffyg tai fforddiadwy, amddiffyn asedau cymunedol, a chreu cwmnïau cydweithredol newydd, a busnesau cymdeithasol. “Mae gweinyddu cynllun peilot grantiau bach ar gyfer y cymunedau, i helpu i adeiladu capasiti lleol, a chyflymu eu syniadau busnes a thai, wedi bod yn alluogwr gwirioneddol i ni. Edrychwn ymlaen at weld y syniadau’n datblygu, ac at weithio gyda mwy o gymunedau dros y misoedd nesaf.”
I gael gwybod mwy ac i wneud cais, cysylltwch â PLANED drwy hello@planed.org.uk, neu ffoniwch 01834 860965
FFURFLEN CAIS: Ffurflen-Cais-Cynllun-Grant-Perthyn-i-Gymunedau-Hydref-2025-1
